ចាប់ផ្តើមដោយព័ត៌មានបច្ចុប្បន្នភាព
គេស្ដាប់ព័ត៌មានរបស់លោកអ្នក ដើម្បីចង់ដឹងអំពីអ្វីដែលកើតឡើង។ ដូចនេះ យើងត្រូវចាប់ផ្តើមសរសេរអត្ថបទនីមួយៗ ជាមួយព័ត៌មានថ្មីៗបំផុត។
ទាញចំណាប់អារម្មណ៍អ្នកស្ដាប់
ឃ្លាដំបូងគេប្រមូលផ្តុំដោយព័ត៌មានបច្ចុប្បន្នភាព ប៉ុន្តែ វាក៏ត្រូវមានភាពទាក់ទាញផងដែរ។ ត្រូវផ្ទៀងផ្ទាត់មើលថាការសរសេររបស់លោកអ្នកមានភាពទាក់ទាញឬនៅ ជាពិសេស ការចាប់ផ្តើមអត្ថបទ។ ប្រសិនជាលោកអ្នកទាញចំណាប់អារម្មណ៍របស់អ្នកស្ដាប់បាន ពួកគេនឹងស្ដាប់ព័ត៌មាននោះ។
ប្រើទម្រង់កាលបច្ចុប្បន្ន
លោកអ្នកត្រូវរៀបរាប់ព្រឹត្តិការណ៍ផ្សេងៗដែលទើបនឹងកើតមាន ឬកំពុងកើតមានឡើង។ បច្ចុប្បន្ន គឺជាកាលដែលត្រូវប្រើនៅក្នុងអត្ថបទ ដោយសម្របទៅតាមការសរសេរព័ត៌មានបច្ចុប្បន្នភាព។
សរសេរឃ្លាខ្លីៗ
ជានិច្ចកាល ព័ត៌មានតែងមានភាពស្មុគស្មាញ។ អ្នកស្ដាប់មិនអាចស្ដាប់បកត្រឡប់ក្រោយទេ។ ពួកគេត្រូវយល់ភ្លាមៗ។ សូមសរសេរឃ្លាអត្ថបទរបស់អ្នក តាមគំរូ៖ ប្រធាន/កិរិយាសព្ទ/កម្មបទ។ សូមសរសេរគំនិតមួយ ក្នុងមួយឃ្លា។ ត្រូវចៀសវាងប្រើល្បះរណប។ ត្រូវដាក់សញ្ញាខណ្ឌ និងចាប់ផ្តើមឃ្លាថ្មី។
ត្រូវជាក់ច្បាស់
អត្ថបទរបស់អ្នកត្រូវខ្លី តែពាក្យនីមួយៗមានសារៈសំខាន់។ ដូចនេះ ត្រូវប្រើពាក្យច្បាស់ ជ្រើសរើសកិរិយាសព្ទឲ្យបានត្រឹមត្រូវ។ ជៀសវាងកិរិយាសព្ទ មាន និង ជា ព្រោះវាមានគ្រប់កន្លែង និងមិនច្បាស់លាស់។
សរសេរអំពីរឿងរ៉ាវផ្សេងៗ និងចៀសវាងការបញ្ចេញទស្សនៈ
អ្នកមិនមែនផ្សាយព័ត៌មាន ដើម្បីបញ្ចេញមតិផ្ទាល់ខ្លួននោះទេ។ សូមរៀបរាប់អំពីបច្ចុប្បន្នភាព និងទុកឱកាសឲ្យអ្នកស្ដាប់វិនិច្ឆ័យដោយខ្លួនឯង។
និយាយ មុននឹងសរសេរ
ព័ត៌មានវិទ្យុគឺជាលំហាត់ផ្ទាល់មាត់មួយ។ ពិធីករអានព័ត៌មាន។ សូមសរសេរអត្ថបទរបស់អ្នក ដោយអានខ្សឹបៗ។ នៅពេលអ្នកជាប់គាំងនឹងពាក្យមួយ ត្រូវដូរពាក្យថ្មី ព្រោះថាអ្នកអាចប្រឈមនឹងបញ្ហានេះ នៅពេលផ្សាយ។ ពេលសរសេរអត្ថបទរួចរាល់ ត្រូវអានឡើងវិញដោយសំទ្បេងខ្លាំងៗ។ ប្រសិនជាអ្នកមិនពេញចិត្តនឹងលទ្ធផល ត្រូវកែសម្រួលអត្ថបទ។
និយាយទៅកាន់អ្នកស្ដាប់
អ្នកសរសេរអត្ថបទដោយខ្លួនឯងផ្ទាល់ ហើយនៅកំឡុងពេលផ្សាយ អ្នកមិនជាប់ពាក់ព័ន្ធនឹងសាធារណជនឡើយ។ ប៉ុន្តែ សូមព្យាយាមស្រមៃអំពីអ្នកស្ដាប់ ថាតើពួកគេនឹងយល់ខ្លឹមសារដែរឬទេ ? សាកល្បងនិយាយទៅកាន់នរណាម្នាក់។ ប្រសិនជាអ្នកសរសេរអត្ថបទបែបនេះ សាធារណជននឹងមានអារម្មណ៍ថាថាអ្នកនិយាយទៅកាន់ពួកគេ ហើយពួកគេនឹងនៅស្ដាប់ព័ត៌មានរបស់អ្នក។
ពិពណ៌នាព័ត៌មាន
វិទ្យុតម្រូវការត្រចៀករបស់អ្នកស្ដាប់។ អត្ថបទល្អមួយបង្កើតជារូបភាពនៅក្នុងខួរក្បាលរបស់អ្នកស្ដាប់។ ដើម្បីទទួលបានលទ្ធផលបែបនេះ អ្នកត្រូវសរសេរបែបពណ៌នា។ ដើម្បីជៀសវាងការភ្លេចភ្លាំង សូមប្រើសំណួរទាំងប្រាំ 5w។ ដើម្បីពិពណ៌នាព័ត៌មាន ត្រូវគិតដល់វិញ្ញាណទាំង៥។ យើងទទួលបានព័ត៌មានទាំងអស់តាមរយៈវិញ្ញាណ៖ ចក្ខុវិញ្ញាណ ឃានវិញ្ញាណ កាយវិញ្ញាណ សោតវិញ្ញាណ និងជីវ្ហាវិញ្ញាណ។