រយៈពេលនៃការសម្ភាសតាមដងផ្លូវ
១នាទី និង៣០វិនាទី ឬអាចតិចជាងនេះ ប្រសិនជាការិយាល័យនិពន្ធព័ត៌មានសម្រេចយកតែ១នាទី
និយមន័យនៃពាក្យ ការសម្ភាសន៍តាមដងផ្លូវ
ការសម្ភាសន៍តាមដងផ្លូវ គឺជាឯកសារជាសំទ្បេងមួយ ដែលប្រមូលផ្តុំទៅដោយចម្លើយរបស់មនុស្សមួយក្រុម ដែលឆ្លើយសំណួរតែមួយដូចគ្នា។
តើនរណាបញ្ចេញទស្សនៈ នៅក្នុងសម្ភាសន៍តាមដងផ្លូវ ?
« Vox Pop ឬ ការសម្ភាសតាមដងផ្លូវ» មានន័យថា សំទ្បេងប្រជាពលរដ្ឋ។ ដូចនេះ ពួកគេសុទ្ធសឹងជា សាមញ្ញជន ដែលបញ្ចេញទស្សនៈនៅក្នុងបទសម្ភាសន៍តាមដងផ្លូវ។ ពួកគេមិនមែនជារដ្ឋមន្រ្តី មេធាវី ប្រធានស្ថាប័ន នាយឧត្តមសេនីយ៍ ឬអ្នកកាន់សាសនាអ្វីឡើយ។
តើត្រូវធ្វើសម្ភាសន៍តាមដងផ្លូវ នៅកន្លែងណា ?
កន្លែងជួបជុំរបស់សាមញ្ញជន : តាមដងផ្លូវ តាមទីផ្សារ…
តើមានមនុស្សប៉ុន្មាននាក់ ដែលត្រូវបញ្ចេញទស្សនៈនៅក្នុងការសម្ភាសន៍តាមដងផ្លូវ ?
មនុស្សចំនួន៦នាក់ គឺជាមធ្យមភាគមួយដ៏សមរម្យ។ ម្នាក់ៗបញ្ចេញទស្សនៈជាមធ្យម ចំនួន១៥វិនាទី។ ដូចនេះ ៦នាក់ គុណនឹង ១៥វិនាទី ស្មើ ១នាទី និង៣០វិនាទី។ ប្រសិនជាអ្នកជ្រើសរើសទម្រង់មួយកាន់តែខ្លី មានន័យថា ៤ទៅ៥នាក់ គឺជាចំនួនមួយគ្រប់គ្រាន់។
តើត្រូវធ្វើសម្ភាសន៍តាមដងផ្លូវយ៉ាងដូចម្តេច ?
ជាបឋម អ្នកត្រូវជ្រើសរើសសំណួរមួយ។ បន្ទាប់មក អ្នកត្រូវចុះទៅកន្លែងផ្ទាល់ ដូចជាផ្សារ ជាដើម និងសួរសំណួរនេះទៅកាន់មនុស្សមួយចំនួន។ អ្នកមិនត្រូវសួរសំណួរច្រើនទេ ព្រោះថាអ្នកមិនមែនមកធ្វើសម្ភាសន៍ផ្លូវការទេ ប៉ុន្តែជាការសម្ភាសន៍តាមដងផ្លូវ។ ដូចនេះ ត្រូវចៀសវាងការណែនាំខ្លួនឯង នៅកន្លែងតែមួយ និងនៅពេលតែមួយ ហើយនឹងត្រូវចៀសវាងការទទួលយកទស្សនៈដដែលៗពីប្រភេទ មនុស្សតែមួយ។
តើត្រូវណែនាំការសម្ភាសតាមដងផ្លូវយ៉ាងដូចម្តេច ?
ការសម្ភាសតាមដងផ្លូវមិនមែនជាការស្ទង់មតិនោះទេ។ វាមិនមែនជាចេតនាបែបវិទ្យាសាស្រ្តឡើយ។ វាគឺជាការឆ្លុះបញ្ចាំងមួយ និងជារូបភាពមួយ។ ដូចនេះ ត្រូវចៀសវាងការធ្វើចំណាត់ថ្នាក់មនុស្ស៖ « ប្រជាជននៅទីក្រុងនេះ ឬសង្កាត់នេះ បានបដិសេធទស្សនៈនេះ តាមរយៈ មតិយោបល់របស់ពួកគេ ».
ក៏ដូចជាបទយកការណ៍ ការសម្ភាសតាមដងផ្លូវត្រូវមានការផ្តើមព័ត៌មាន ជាមួយនឹងសំណួរ « នរណា អ្វី កន្លែងណា និងពេលណា?» និងមុំព័ត៌មាន។ អ្នកយកព័ត៌មានសរសេរពីការផ្តើមព័ត៌មានរបស់ខ្លួន ខណៈដែលពិធីករនឹងសរសេរអត្ថបទនេះឡើងវិញ ជាមួយសំទ្បេងផ្ទាល់របស់គេ។