មុំព័ត៌មានជាជម្រើសសារព័ត៌មានមួយ
ជារៀងរាល់ថ្ងៃ ប្រព័ន្ធផ្សព្វផ្សាយកំពុងប្រកួតប្រជែងផលិតព័ត៌មានសំខាន់ៗ។ ចំពោះប្រធានបទតែមួយ យើងគ្រប់គ្នាអាចកត់សម្គាល់ឃើញថាលទ្ធផលការងារមានភាពខុសៗគ្នា ពីស្ថានីយវិទ្យុមួយ ទៅស្ថានីយមួយផ្សេងទៀត។ វាអាស្រ័យទៅលើមុំព័ត៌មានដែលត្រូវបានជ្រើសរើស ដើម្បីផលិតចេញជាព័ត៌មាន។ ប្រសិនជាជ្រើសរើសមុំបានត្រឹមត្រូវ បទយកការណ៍នោះពិតជាមានភាពទាក់ទាញ។
មុំព័ត៌មាន : ការឆ្លើយតបទៅនឹងលក្ខខណ្ឌជាក់ស្ដែងនៃអាជីពជាអ្នកយកព័ត៌មាន
ការផ្តល់ព័ត៌មានទាំងអស់នៅលើក្រដាសតែមួយត្រឹមតែរយៈពេលមួយនាទី គឺមិនអាចធ្វើទៅរួចឡើយ។ អ្នកយកព័ត៌មានវិទ្យុទទួលយកលក្ខខណ្ឌនេះ និងប្រែក្លាយវាឲ្យទៅជាគុណសម្បត្តិ។ ការជ្រើសរើសមុំព័ត៌មានបានល្អមានប្រយោជន៍លើរយៈពេលកំណត់នៃបទយកការណ៍របស់អ្នក។ គ្មានអ្វីហាមឃាត់អ្នកមិនឲ្យផលិតប្រធានបទមួយ ក្រោមមុំពីរផ្សេងគ្នាឡើយ : មុំមួយសម្រាប់ព័ត៌មានពេលល្ងាច និងមួយទៀតសម្រាប់ព័ត៌មាននៅព្រឹកថ្ងៃបន្ទាប់។
តើយើងកំណត់មុំនៃប្រធានបទមួយនៅពេលណា?
ពេលវេលាដ៏ត្រឹមត្រូវក្នុងការជ្រើសរើសមុំមួយនៃប្រធានបទមួយ គឺនៅក្នុងកិច្ចប្រជុំផ្នែកនិពន្ធព័ត៌មាន : តើយើងត្រូវសរសេរប្រធានបទនីមួយៗយ៉ាងដូចម្តេច? តើរឿងរ៉ាវអ្វីដែលអ្នកស្ដាប់ចាប់អារម្មណ៍ ទាក់ទងនឹងប្រធានបទនេះ ? តើនរណាជាដៃគូសន្ទនាដ៏ល្អនៅក្នុងកិច្ចសម្ភាសន៍មួយ ? វិធីដ៏ល្អបំផុតដើម្បីឆ្លើយសំណួរទាំងនេះ គឺត្រូវពិភាក្សាជាក្រុម នៅក្នុងកិច្ចប្រជុំពេលព្រឹក។
ឧទាហរណ៍អំពីមុំព័ត៌មាន
ជ្រើសរើសប្រធានបទមួយអំពីបច្ចុប្បន្នភាព : អគ្គិភ័យមួយបានកើតមានឡើងនៅក្នុងសង្កាត់មួយនៃទីក្រុងរបស់លោកអ្នក។ ភ្លើងកំពុងឆាបឆេះផ្ទះសំបែង និងកន្លែងរកស៊ី។ ខាងក្រោមនេះគឺជាឧហរណ៍មួយចំនួនអំពីមុំព័ត៌មានដែលអាចមាន :
មុំទីមួយ : បញ្ជូនអ្នកយកព័ត៌មានទៅកាន់កន្លែងកើតហេតុ និងឲ្យគាត់ហៅទូរស័ព្ទមកយើងរាយការណ៍ព័ត៌មានអំពីអគ្គភ័យនេះ។ ការងារ : អត្ថបទសរសេរនិងរាយការណ៍ផ្សាយតាមទូរស័ព្ទ។
មុំទីពីរ : ធ្វើរបាយការណ៍អំពីការខូចខាតទ្រព្យសម្បត្តិ និងមនុស្ស : ចំនួនអ្នកស្លាប់ និងអ្នករបួស តើការសង្រ្គោះយ៉ាងដូចម្តេច? តើមានផ្លូវ និងផ្ទះប៉ុន្មានដែលរងការប៉ះពាល់ ។ល។ ការងារ : បទសម្ភាសន៍ជាមួយអ្នកទទួលខុសត្រូវ។
មុំទីបី : ពន្យល់អំពីរឿងរ៉ាវដែលបានកើតមានឡើង ពេលវេលា និងទីតាំងដែលភ្លើងចាប់ផ្តើមឆាបឆេះ? មូលហេតុ? តើវាជាអគ្គិភ័យកើតឡើងដោយចេតនាឃាតកម្ម ឬ ដោយចៃដន្យ? ការងារៈ សរសេរអត្ថបទនៅក្នុងបន្ទប់ធ្វើការ។
យើងអាចជ្រើសរើសមុំមួយនៅក្នុងចំណោមមុំជាច្រើន។ យើងអាចផលិតមុំឲ្យបានច្រើន ដើម្បីធ្វើឲ្យបទយកការណ៍មានលក្ខណៈខុសប្លែកពីការផ្សាយព័ត៌មានមួយទៅការផ្សាយមួយទៀត។ ប្រសិនជាព្រឹត្តិការណ៍នោះសំខាន់ណាស់ យើងអាចធ្វើមុំច្រើននៅក្នុងការចេញផ្សាយតែមួយ រួចបង្កើតជាសំណុំរឿងមួយ។
គោលការណ៍នេះត្រូវយកទៅអនុវត្តបានរាល់ព្រឹត្តិការណ៍ទាំងអស់ ទាំងរឿងនយោបាយ វប្បធម៌ សេដ្ឋកិច្ច និងកីឡា (អត្ថបទសរសេរ មុនការប្រកួត សំទ្បេងមុនការប្រកួត ការរាយការណ៍ក្រោយការប្រកួត បទសម្ភាសន៍ជាមួយកីឡាករ គ្រូបង្វឹក និងឯកសារវិភាគ…)
ការងារដូចគ្នា សម្រាប់សវនាការកាត់ទោសមួយ : ឯកសារអំពីអង្គហេតុ បទបង្ហាញរបស់ជនជាប់ចោទ ឯកសារសង្ខេបអំពីសវនាការ បទយកការណ៍ជាសំទ្បេងរបស់មេធាវីរបស់ភាគីទាំងពីរ…