ជាទូទៅ ស្ថានីយវិទ្យុមានកិច្ចប្រជុំបីដងក្នុងមួយថ្ងៃ
កិច្ចប្រជុំពេលព្រឹក គឺជាកិច្ចប្រជុំសំខាន់បំផុត ដែលប្រព្រឹត្តទៅនៅម៉ោង ៩ព្រឹក ភ្លាមៗបន្ទាប់ពីការផ្សាយព័ត៌មានពេលព្រឹករួចរាល់។ ការប្រជុំនេះមានគោលបំណងកំណត់ប្រធានបទប្រចាំថ្ងៃ។ កិច្ចប្រជុំមួយទៀតប្រព្រឹត្តទៅនៅដើមរសៀល ដើម្បីរៀបចំនិងបន្ថែមព័ត៌មាន តាមបច្ចុប្បន្នភាព។ កិច្ចប្រជុំចុងក្រោយធ្វើឡើងនៅពេលល្ងាច បន្ទាប់ពីការផ្សាយព័ត៌មានប្រចាំថ្ងៃចុងក្រោយ និងមុនការផ្សាយកម្មវិធីពេលយប់។ ពេលនោះ យើងត្រូវប្រមូលផ្ដុំព័ត៌មានផ្សេងៗ និងរៀបចំការផ្សាយសម្រាប់នៅព្រឹកបន្ទាប់។
កិច្ចប្រជុំផ្នែកនិពន្ធព័ត៌មានត្រូវបានកំណត់
អ្នកចូលរួមមានវិន័យនិងគោរពគ្នាទៅវិញទៅមក។ វាមិនមែនជាបន្ទប់មួយ ដែលយើងអាចជជែកគ្នាបានដោយសេរីនោះទេ។ កិច្ចប្រជុំមួយមានរយៈពេលចាប់ពី៤៥នាទី ទៅមួយម៉ោង ដើម្បីអនុញ្ញាតឲ្យអ្នកយកព័ត៌មានអាចចាកចេញទៅយកព័ត៌មានខាងក្រៅបានយ៉ាងលឿនតាមដែលអាចធ្វើបាន ហើយអ្នកអត្ថាធិប្បាយអាចរៀបចំអត្ថបទរបស់ខ្លួនបាន។
វិធីសាស្រ្តនៃការដឹកនាំកិច្ចប្រជុំមួយ
វិធីសាស្រ្តទីមួយ គឺត្រូវមានជំហរដាច់ខាត។ និពន្ធនាយកត្រូវយកបញ្ជីប្រធានបទមួយ និងបែងចែកឲ្យ ក្រុមការងារ។ វិធីសាស្រ្តទីពីរទាក់ទងនឹងការគ្រប់គ្រងបែបទំនើប។ កិច្ចប្រជុំចាប់ផ្តើមជាមួយនឹងការស្ដាប់គំនិតផ្សេងៗរបស់អ្នកយកព័ត៌មាន និងទស្សនៈរបស់ពួកគេអំពីបច្ចុប្បន្នភាព។ បន្ទាប់មក យើងកែសម្រួលទៅតាមកត្តាផ្សេងៗដែលមិនអាចចោលបាន ដូចជា ការណាត់ជួប សន្និសីទសារព័ត៌មាន និងការស៊ើបអង្កេតដែលកំពុងដំណើរការ…
ឧទាហរណ៍ : ការប្រជុំពេលព្រឹក
នៅម៉ោង៩ព្រឹក អ្នកយកព័ត៌មានទាំងអស់ត្រូវមានវត្តមាន តាមការកំណត់។ ពួកគាត់ត្រូវមកឲ្យបានទាន់ពេលវេលា។
ដំណាក់កាលទីមួយ :
ជាបឋម អ្នកធ្វើអត្ថាធិប្បាយព័ត៌មានពេលព្រឹកចាប់ផ្តើមនិយាយ ដោយធ្វើការវិភាគលើប្រធានបទសម្រាប់ចាក់ផ្សាយនៅពេលព្រឹក : តើបទយកការណ៍មានភាពទាក់ទាញដែរឬទេ? តើយើងនៅខ្វះខាតចំណុចណាមួយដែរឬទេ? តើយើងត្រូវដោះស្រាយយ៉ាងដូចម្តេច?
បន្ទាប់មក អ្នកយកព័ត៌មាន និងនិពន្ធនាយក ចាប់ផ្ដើមនិយាយ និងធ្វើការវិភាគមួយយ៉ាងលឿន។
រយៈពេល១០នាទី ប្រព្រឹត្តទៅដោយគ្មានទំនាស់ ឬការជជែកវែកញែកមិនចាំបាច់។
ដំណាក់កាលទីពីរ :
ការពិភាក្សានៅនឹងតុ : មតិយោបល់ និងគំនិតរបស់អ្នកយកព័ត៌មានអំពីបច្ចុប្បន្នភាព។ អ្វីដែលមានប្រសិទ្ធភាពបំផុត គឺត្រូវមានក្ដារខៀនធំមួយ ដែលគេអាចកត់ត្រារាល់សំណើផ្សេងៗ។ ធ្វើដូច្នេះ អ្នករាល់គ្នាអាចមើលឃើញបាន។
ដោយប្រៀបធៀបជាមួយទិនានុលេខន៍ប្រចាំថ្ងៃ យើងត្រូវពិនិត្យមើលអ្វីដែលជាអាទិភាព និងអ្វីដែលយើងអាចនឹងសរសេរពង្រីកបន្ថែមនៅពេលខាងមុខ។
ជាចុងបញ្ចប់ នៅក្នុងដំណើរការនៃកិច្ចប្រជុំ យើងជ្រើសរើសមុំទាំងឡាយណា និងពិភាក្សាថាតើយើងត្រូវសរសេរអត្ថបទតាមមុំណាមួយ (បទយកការណ៍ សំទ្បេង បទយកការណ៍ជាសំទ្បេង និងភ្ញៀវ)…
នៅពេលបញ្ជីការងារនេះត្រូវបានធ្វើរួចរាល់ហើយ គ្រប់គ្នាមានទស្សនៈមួយអំពីអ្វីដែលនឹងត្រូវកើតឡើង និងអាចសម្រេចការងាររបស់ពួកគេ។ កិច្ចសន្ទនា និងការផ្លាស់ប្ដូរបានពង្រឹងឆន្ទៈរបស់ក្រុមការងារ។
កិច្ចប្រជុំពីរផ្សេងទៀត (រសៀល និងល្ងាច) គឺជាការពិភាក្សានៅនឹងតុមួយរយៈពេលខ្លី ដែលយើងត្រូវប្រមូលនិងបន្ថែមចំណុចផ្សេងៗ។