និយមន័យ
ការផ្ដើមបង្ហាញព័ត៌មានគឺជាអត្ថបទមួយដែលពិធីករសរសេរ ដើម្បីងាយស្រួលចាប់ផ្តើមផ្សាយ មានន័យថាបង្ហាញប្រធានបទមួយ នៅក្នុងការផ្សាយព័ត៌មានប្រចាំថ្ងៃ។
រយៈពេលនៃការផ្តើមបង្ហាញព័ត៌មាន
ការផ្តើមបង្ហាញព័ត៌មានមានរយៈពេលប្រមាណជា២០វិនាទី ជាមធ្យម ស្មើនឹង ៣ឃ្លា ជាអប្បបរមា និង ៥ ទៅ ៦ឃ្លា ជាអតិបរមា។
ទម្រង់នៃការផ្តើមបង្ហាញព័ត៌មាន
ការផ្តើមបង្ហាញព័ត៌មានត្រូវបានបែងចែកជាបីផ្នែក គឺ :
ផ្នែកទី១ : ឃ្លាទាក់ទាញដំបូងត្រូវនិយាយអំពីបច្ចុប្បន្នភាព
មានបច្ចេកទេសសាមញ្ញមួយដើម្បីកំណត់ព័ត៌មានបច្ចុប្បន្នភាព គឺត្រូវសួរខ្លួនឯងថាតើអ្វីជាព័ត៌មានថ្មី ? ចម្លើយត្រូវសរសេរមួយឃ្លា។ ត្រូវសរសេរឃ្លានេះបែបលក្ខណៈទាក់ទាញ ដើម្បីទាញយកចំណាប់អារម្មណ៍របស់អ្នកស្ដាប់។
ផ្នែកទី២ : ព័ត៌មានបន្ថែម
ផ្នែកនេះត្រូវសរសេរយ៉ាងតិចបំផុតមួយឃ្លា។ ប៉ុន្តែ ជាធម្មតា វាមានចំនួន ២ ឬ៣ឃ្លា ដែលពោរពេញទៅដោយព័ត៌មានសំខាន់ៗមួយចំនួន ងាយស្រួលយល់។ ដើម្បីប្រាកដថាអ្នកមិនបានភ្លេចសំណួរទាំងប្រាំ (5W) (នរណា ពេលណា កន្លែងណា ជាអ្វី និងហេតុអ្វី) អ្នកត្រូវផ្ទៀងផ្ទាត់មើលថាតើការផ្តើមបង្ហាញព័ត៌មានរបស់អ្នកឆ្លើយតបទៅនឹងសំណួរទាំង៥នេះដែរឬទេ។
ផ្នែកទី៣ : ឃ្លាបង្ហាញពីមុំព័ត៌មាននៃប្រធានបទដែលគេសរសេរ
អ្នកយកព័ត៌មានអាចសម្រេចប្រធានបទមួយបាន អាស្រ័យលើមុំនិងការបំភ្លឺផ្សេងៗ។ ឧទាហរណ៍ បទយកការណ៍មួយ ស្ដីពីការចាប់ផ្តើមសវនាការជំនុំជម្រះមួយ។ ខាងក្រោមនេះគឺជាមុំដែលអាចមាន៖
-ប្រវត្តិរបស់ជនជាប់ចោទ ក្រោមរូបភាពជាបទយកការណ៍។
-ការរម្លឹកពីអង្គហេតុ ដែលនាំឲ្យកើតមានការសវនាការជំនុំជម្រះនេះ ក្រោមរូបភាពជាបទយកការណ៍។
-កិច្ចសម្ភាសន៍មួយ រវាងក្រុមមេធាវីជនរងគ្រោះ និងក្រុមមេធាវីជនជាប់ចោទ ។ល។
ឧទាហរណ៍នៃការផ្តើមបង្ហាញព័ត៌មាន
ផ្នែកទី១ :
សវនាការជំនុំជម្រះឃាតកដែលត្រូវបានចោទប្រកាន់ពីបទឃាតកម្មលើរូបលោក Laurent Désiré Kabila បានចាប់ផ្តើមនៅព្រឹកនេះ នៅក្រុង Kinshasa ។
ផ្នែកទី២ :
ថ្ងៃដំបូង គឺជាការអានបទចោទប្រកាន់។ ជនជាប់ចោទកំពុងជាប់ឃុំឃាំងនៅពន្ធនាគារម៉ាកាឡា អំទ្បុងពេលសវនាការជំនុំជម្រះទាំងមូល។
ផ្នែកទី៣ :
ជនជាប់ចោទសំខាន់ គឺលោក Eddy Kapend អតីតនាយសេនាធិការរបស់ប្រធានាធិបតី Kabila។ ប្រវត្តិរបស់ជនជាប់ចោទត្រូវបានសរសេរដោយអ្នករាយការណ៍ព័ត៌មាន Paul L។