Menu

អ្នកនិពន្ធ

  • CFI & ESJ

    ទស្សនៈ និងការអភិវឌ្ឍគម្រោង ២៤ ម៉ោង

    គម្រោងនេះ​ត្រូវ​បានអភិវឌ្ឍដោយទីភ្នាក់ងារសហប្រតិបត្តិការ​ប្រព័ន្ធផ្សព្វផ្សាយបារាំង(CFI)​និង​សាលាជាន់ខ្ពស់​សារព័ត៌មាន​ (ESJ) ដើម្បីបំពេញបន្ថែមលើ​សេវាកម្ម​ដែល​ស្នើដោយ​អ្នកវិជ្ជជាជីវៈព័ត៌មាន​វ័យក្មេង និង​និស្សិតសារព័ត៌មាន (គម្រោង)។ ទស្សនៈ និង​ការអភិវឌ្ឍ​ត្រូវ​បាន​ដឹកនាំ​ឡើង​ដោយ​លោក អ៊ីវ រ៉ឺណាដ៍ (Yves Renard) អ្នក​យកព័ត៌មាន​ និងជា​ប្រធានដេប៉ាតឺម៉ង​ ​អភិវឌ្ឍន៍ប្រទេសបារាំង និងអន្តរជាតិនៃ​សាលាជាន់ខ្ពស់​សារព័ត៌មាន​ទីក្រុង​លីល​(ESJ Lille)និងដោយលោក ឡូរ៉ង់ អាឡារី (Laurent Allary) ទីប្រឹក្សា​របស់​អគ្គនាយក​ CFI។ គេហទំព័រនេះ​ត្រូវ​បាន​អភិវឌ្ឍ​ដោយ​ទីភ្នាក់ងារ La Confiserie ក្រោម​កិច្ច​សហ​ប្រតិបត្តិការ​ជាមួយលោក ហ្ស៊ុលីយៀង ហ្គុយអេត (Julien Gueit) អ្នកទទួល​ខុសត្រូវ​ប្រព័ន្ធ​ផ្សព្វផ្សាយ​ថ្មី​សម្រាប់ CFI ។

  • លោក អាឡាំង រ៉ូឡាត (ALAIN ROLLAT)

    ២៤ម៉ោងនៃការងារកាសែត

    លោក អាឡាំង រ៉ូឡាត ជាអ្នកយក​ព័ត៌មាន​អាជីពអស់រយៈពេល​៤៩ឆ្នាំ​មកហើយ។ លោក​បាន​ចាប់​ផ្តើម​ការងារ​នេះ​នៅឆ្នាំ​១៩៦៣ នៅសារព័ត៌មាន MidiLibre កាសែតប្រចាំថ្ងៃ​មួយរបស់ Languedoc-Roussillon ។ បន្ទាប់មក លោកបានក្លាយជាអ្នកនិពន្ធ​ព័ត៌មាននៅទីក្រុងម៉ុងពើល្យ៉េ ទីក្រុងការកាស់សូន ទីក្រុងពែរពីញ៉ង់ និងទីក្រុងប៉ារីស។ នៅឆ្នាំ​១៩៧៧ លោកបានធ្វើការក្នុង​ផ្នែកនយោបាយរបស់កាសែត Le Monde។ ពេល​នោះ លោក​បាន​ក្លាយជាអនុប្រធាន​ផ្នែក មុននឹងដឹកនាំ​ផ្នែក​ប្រព័ន្ធផ្សព្វផ្សាយ នៅឆ្នាំ​១៩៩២ ដែល​លោក​បាន​បង្កើតឡើង រហូតលោក​បាន​ក្លាយជា​សមាជិក​និពន្ធនាយក អ្នកសរសេរ​បទវិចារណកថា និងអ្នកសរសេរ​រឿងរ៉ាវប្រវត្តិសាស្រ្ត។ លោក​​ធ្វើការ​ជាមួយ​ថ្នាក់ដឹកនាំកាសែត Le Monde ក្នុងឋានៈជា​អនុប្រធាន​ក្រុមហ៊ុន។ ក្រោយមក ជាមួយ​តំណែង​នេះ ​ លោក​បាន​ដឹកនាំ​សារព័ត៌មាន​ប្រចាំថ្ងៃ CentrePresse នៅទីក្រុងអាវ័យរ៉ុង មុននឹងលោក​បាន​ចាកចេញពី​កាសែត Le Monde ដោយ​ស្ម័គ្រចិត្ត​ នៅឆ្នាំ​២០០១។ នៅខែមីនា ឆ្នាំ​២០០៦ លោក​បាន​បង្កើត​សារព័ត៌មាន La Gazette de Sète។ បច្ចុប្បន្ននេះ លោកគឺជា​ប្រធាន​គម្រោង​សម្រាប់​ ESJ-International ។ លោក អាឡាំង រ៉ូឡាត ក៏ជា​អ្នក​និពន្ធសៀវភៅ​ប្រមាណ​ជាង១០ក្បាល​ផង​ដែរ។

  • លោក រីឆាត ពែរណូលឡេ (RICHARD PERNOLLET)

    ២៤ម៉ោងនៃការងារវិទ្យុ

    បច្ចុប្បន្ននេះ ខ្ញុំជាអ្នកយកព័ត៌មាន​ជាន់ខ្ពស់ និងជា​គ្រូបណ្ដុះបណ្តាល​អន្តរជាតិ នៅសាលាជាន់ខ្ពស់​សារព័ត៌មាន​អន្តរជាតិ (ESJ) និងស្ថាប័នផ្សេងទៀត ដូចជា​វិទ្យាស្ថាន Panos Paris, GRET ឬ [Est-Ouest consulting]។ ខ្ញុំ​បាន​បំពេញ​បេសកកម្ម​ជាង​៦០ នៅក្នុង​ប្រទេស​ចំនួន​២៥ ក្នុង​ក្រប​ខណ្ឌ​កម្មវិធី​គាំទ្រ​ប្រព័ន្ធ​ផ្សព្វផ្សាយនៃប្រទេសកំពុង​មាន​វិបត្តិ (ទ្វីបអាហ្រ្វិក ទ្វីបអាស៊ី អឺរុប​ខាងកើត…)។ ​នៅសាលា ESJ ចាប់តាំង​ពីឆ្នាំ​២០១០ ខ្ញុំ​គឺជា​ « គ្រូបណ្តុះបណ្តាល » សម្រាប់ថ្នាក់​អនុបណ្ឌិតអន្តរជាតិ​ប្រព័ន្ធ​ផ្សព្វផ្សាយ ដែលត្រូវ​បាន​បង្កើត​ឡើង​ដោយ​សហការ​ជាមួយ IAE (ថ្នាក់​ឧត្តមសិក្សា​គ្រប់គ្រង នៃសាកលវិទ្យាល័យ លីល២)។ ថ្នាក់​សិក្សា​នេះ​ទើបតែ​ដំណើរ​ការ​បាន​៣វគ្គ ដោយ​មាន​ការចូលរួម​ពី​បេក្ខជន​នៃបណ្តា​ប្រទេស​ភាគ​ខាង​ត្បូង។

    កាល​ពីមុន ខ្ញុំ​បានធ្វើ​ការអស់​រយៈពេល​ជាង​២០ឆ្នាំ នៅ Radio France ក្នុង​តំណែង​​ជា​អ្នក​រាយការណ៍​ព័ត៌មាន​ ឬអ្នក​ធ្វើ​អត្ថាធិប្បាយ​ព័ត៌មាន (France Inter និង France Info) និងជាបុគ្គលិកជាន់ខ្ពស់​នៅ​​បណ្តាញព័ត៌មាន​ France Bleu តាម​ស្ថានីយវិទ្យុ​ក្នុង​ស្រុក រួមមានតំណែង​៣ជា​និពន្ធនាយក តំណែងពីរជា​នាយក​

    ខ្ញុំ​ជា​អ្នក​និពន្ធ​ទស្សនាវដ្តីវិទ្យុ​ជាច្រើន និងក៏ជា​អ្នក​ប្រមូលផ្តុំឯកសារ-អ្នករៀបចំ​ឯកសារ​វីដេអូ

    ឯកសារ «  ២៤ម៉ោងនៃ​ការ​សរសេរ​ព័ត៌មាន​វិទ្យុ » គឺជាផ្លែផ្កា​នៃ​ការសហការ​មួយជាមួយ​លោក​ អ៊ីវ រ៉ឺណាដ៍ នាយកសាលា ESJ International និងលោក ព្យែរ សាវារី នាយក​ផ្នែកសិក្សា​នៃសាលា ESJ Lille ដែលនៅទីនោះ​ពួកយើង​បាន​ប្រមូល​ផ្តុំ​បទពិសោធន៍ទៅវិញទៅមកជាអ្នកយក​ព័ត៌មាន​​វិទ្យុ ដើម្បី​បកប្រែ​គោលការណ៍សំខាន់ៗ និង​បច្ចេកទេសនៃសារព័ត៌មាន​វិទ្យុ ជាពាក្យសាមញ្ញៗ។

  • លោក ដាវីដ ស៊ែរវេណាយ (DAVID SERVENAY)

    ២៤ម៉ោងនៃការងារវេបសាយព័ត៌មាន

    លោក ដាវីដ ស៊ែរវេណាយ គឺជាអ្នក​យកព័ត៌មាន (ប្រចាំវិទ្យុបារាំងអន្តរជាតិ RFI គេហទំព័រព័ត៌មាន Rue89.com OWNI.fr និង Les Inrocks…) អស់រយៈពេល​ជាង​១៥ឆ្នាំ​មកហើយ។ លោក​មានឯកទេស​ខាង​ស៊ើបអង្កេតទាក់ទងនឹងរឿងនយោបាយ ធុរកិច្ច និង​សេដ្ឋកិច្ច ទាំង​សម្រាប់​សារព័ត៌មាន និង​សម្រាប់​ការ​បោះពុម្ពផ្សាយ (សៀវភៅពីរក្បាលត្រូវបានបោះពុម្ពផ្សាយដោយរោងពុម្ព La Découverte)។ សព្វថ្ងៃនេះ លោកធ្វើការងារ​ដោយឯករាជ្យ និង​ផ្តល់វគ្គបណ្ដុះបណ្តាលលើ​រឿងស៊ើបអង្កេត និង​សារព័ត៌មាន​ពហុផ្សព្វផ្សាយ សម្រាប់ស្ថាប័នផ្សេងៗ (ESJ Lille និង CFI)។

  • លោក ឌីដេយ៉េ ដេស័រម៉ូ និងលោកស្រី ប្រ៊ីហ្សីត ប៉េស (DIDIER DESORMEAUX ET BRIGITTE BESSE)

    ២៤ម៉ោងនៃការងារទូរទស្សន៍

    លោក ឌីដេយ៉េ ដេស័រម៉ូ គឺជានិពន្ធនាយក និងជាអ្នកទទួលខុសត្រូវដេប៉ាតឺម៉ង «ព័ត៌មាន និងការ​បោះពុម្ពផ្សាយពហុប្រភេទ» នៅសាកលវិទ្យាល័យ France Télévisions ។ លោកគឺជា​បណ្ឌិត​ផ្នែក​វិទ្យាសាស្រ្ត​ព័ត៌មាន ​និង​ទំនាក់ទំនង។ លោករៀបចំ​ និង​ផ្តល់​វគ្គ​បំពាក់​បំប៉ន​សម្រាប់បុគ្គលិកជាន់ខ្ពស់ និង​អ្នក​យកព័ត៌មាន​របស់ France-Télévisions។ លោកក៏បាន​បំពេញ​បេសកកម្ម​អភិវឌ្ឍន៍អន្តរជាតិនៅតាម​ស្ថានីយទូរទស្សន៍​អាស៊ី អាហ្រ្វិក និង​មជ្ឈិមបូព៌ា សម្រាប់ស្ថានីយ Canal International និង​នៅអឺរ៉ុបខាងកើត សម្រាប់សមាគម​ទូរទស្សន៍​ប្រចាំតំបន់នៃទ្វីបអឺរ៉ុប (Circom)។ លោកគឺជា​ប្រធានសមាគម​អ្នកទទួល​ខុសត្រូវ​វគ្គបណ្តុះបណ្តាល​វិទ្យុនិង​ទូរទស្សន៍​បារាំង (FORTEF)។ នៅក្នុង​ក្របខណ្ឌការងារនេះ លោក​បង្ហាញ​បទពិសោធន៍ជាមួយ​វិធីសាស្រ្តថ្មីៗ​នៃការ​សរសេរ​បទយកការណ៍​បច្ចុប្បន្នភាព (ជាមួយឧបករណ៍​រូបភាពឌីជីថល ឬ 3D)។

    លោកស្រី ប្រ៊ីហ្សីត ប៉េស គឺជា​នាយិកាផ្នែកសិក្សានៅ​វិទ្យាស្ថាន​សារព័ត៌មាន​ប្រចាំតំបន់​ប៊រដូ អាគីតែន (IJBA) និងជា​អ្នក​ទទួល​ខុសត្រូវ​ជំនាញ​ទូរទស្សន៍។ លោកស្រីបញ្ចប់ថ្នាក់​បណ្ឌិត​ភាសាវិទ្យា និង​រោគសញ្ញាវិទ្យា។ លោកស្រីជា​អ្នកឯកទេស​ខាង​អំណះអំណាង និងរបាយការណ៍ជាអត្ថបទ-រូបភាព។ លោកស្រីបាន​ដឹកនាំ​កម្មវិធី​បញ្ចេញមតិរិះគន់ និងការសរសេរ សម្រាប់ស្ថានីយ​ TF1 France Télévisions, Radio-France និង RTBF (វិទ្យុ ទូរទស្សន៍ប៊ែលហ្សិកនិយាយ​ភាសាបារាំង) TSR (វិទ្យុ ទូរទស្សន៍ស្វីស រ៉ូម៉ង់) និង INA (វិទ្យាស្ថាន​ជាតិ​សោតទស្សន៍)។ សម្រាប់ CFI លោកស្រី​​រៀបចំ​បេសកកម្មបណ្តុះបណ្តាលអំពីបទយកការណ៍ទូរទស្សន៍ (នៅប្រទេសស្រីលង្កា បង់ក្លាដេស និង​ហ្គាណា)។ ជាមួយនឹង «អ្នកធ្វើការផ្នែករោគសញ្ញាវិទ្យា» ដែលជាភ្នាក់ងារវិភាគប្រព័ន្ធផ្សព្វផ្សាយព័ត៌មានបង្កើតទ្បើងដោយលោកស្រីនៅឆ្នាំ២០០២ ជាមួយលោក អេរិក ម៉ាសេ (Eric Macé) លោកស្រី​បាន​សម្រេចជោគ​ជ័យ​លើការ​សិក្សា​ផ្នែកសង្គម-រោគសញ្ញាវិទ្យា ជាពិសេស​សម្រាប់ឧត្តមក្រុមប្រឹក្សាសោតទស្សន៍ (CSA) និងក្រុមប្រឹក្សាអឺរ៉ុប​នៃកម្មវិធីប្រព័ន្ធផ្សព្វផ្សាយព័ត៌មានប្រឆាំងនឹងការប្រកាន់ពូជសាសន៍នៅក្នុងកីទ្បា MARS។

    លោកស្រី ប្រ៊ីហ្សីត ប៉េស និងលោក ឌីដេយ៉េ ដេស័រម៉ូ បានសរសេររួមគ្នានូវសៀវភៅ «ផលិត​បទយកការណ៍​ទូរទស្សន៍» ដែលត្រូវបាន​បោះពុម្ពផ្សាយនៅឆ្នាំ​១៩៩៧ និង​បកប្រែ​ជាភាសា​អង់គ្លេសនៅឆ្នាំ​២០០៣ (« Television news reporting ») ដោយមានការ​ឧបត្ថម្ភគាំទ្រពីសំណាក់​សភាអឺរ៉ុប ។ បន្ទាប់មក សៀវភៅ​នេះត្រូវ​បាន​បកប្រែជាភាសារុស្ស៊ី ​នៅឆ្នាំ​២០០៤ តាមរយៈការ​ឧបត្ថម្ភ​របស់​សហភាព​អឺរុប និង​ត្រូវ​បាន​ផ្សព្វផ្សាយ​ដោយ Internews។ សៀវភៅ «ផលិត​បទយកការណ៍​ទូរទស្សន៍-ពហុប្រភេទ» ត្រូវ​បាន​បោះពុម្ពផ្សាយ​លើកទី៤ ជាភាសាបារាំង ដោយ​រោងពុម្ព Victoires Editions ។ ដោយមានការចូលរួមលោក អ៊ែរវ៉េ ប្រ៊ុយស៊ីនី (Hervé Brusini)

    លោកស្រី ប្រ៊ីហ្សីត ប៉េស និងលោក ឌីដេយ៉េ ដេស័រម៉ូ បានសរសេររួមគ្នានូវ​សៀវភៅ «អក្ខរាវិរុទ្ធបារាំង ៣» ដែលបានបោះពុម្ពផ្សាយនៅឆ្នាំ​២០០៨។