អត្តចរិករបស់អ្នករាយការណ៍ព័ត៌មាន
ពេលចុះទៅដល់ទីតាំងយកព័ត៌មាន អ្នករាយការណ៍ព័ត៌មានត្រូវចេះផ្តួចផ្តើមគំនិត ជ្រើសរើសដៃគូសន្ទនាល្អៗ និងចោទសួរសំណួរល្អៗ។ អ្នករាយការណ៍ព័ត៌មានត្រូវអង្កេត និងកត់ត្រា។ ឧបករណ៍របស់អ្នកយកព័ត៌មានវិទ្យុ គឺសំទ្បេង។ អ្នករាយការណ៍ព័ត៌មានចេះថតសំទ្បេងបទសម្ភាសន៍ បង្កើតបរិយាកាសល្អ និងនាំយកត្រឡប់មកវិញនូវព័ត៌មានជាសំទ្បេងច្បាស់ៗ (ឯកសារ ១៩)។
មុននឹងចេញដំណើរ : ត្រូវយល់ច្បាស់ពីប្រធានបទ
អ្នកត្រូវអានព័ត៌មានខ្លីរបស់ទីភ្នាក់ងារព័ត៌មាន សេចក្តីប្រកាសព័ត៌មាន សំណុំឯកសារសារព័ត៌មាន និងអត្ថបទដែលគេសរសេររួចហើយទាក់ទងនឹងប្រធានបទ។ អ្នកត្រូវធានាថាយល់ច្បាស់អំពីរឿងនេះ។ អ្នកត្រូវផ្ទៀងផ្ទាត់ឈ្មោះ ព្រឹតិ្តការណ៍ កាលបរិច្ឆេទ និងតួលេខ សម្រាប់ឲ្យដៃគូសន្ទនារបស់អ្នកគេជ្រើសរើសយកដោយប្រុងប្រយ័ត្ន។
កំណត់មុំព័ត៌មាន
តើទិដ្ឋភាពអ្វីនៃប្រធានបទព័ត៌មាន ដែលមានតម្លៃ ? តើត្រូវពន្យល់បំភ្លឺប្រធានបទមួយយ៉ាងដូចម្តេច ដើម្បីឲ្យគេយល់ ? តើអ្នកស្ដាប់ចាប់អារម្មណ៍លើអ្វី ? អ្នកត្រូវសួរខ្លួនឯងនូវសំណួរទាំងនេះ មុននឹងចេញដំណើរ ? សហការីរបស់អ្នកនឹងជួយស្វែងរកមុំព័ត៌មានល្អៗ នៅក្នុងកិច្ចប្រជុំផ្នែកនិពន្ធព័ត៌មាន។
រៀបចំបញ្ជីសំណួរ
អ្នកមិនត្រូវសរសេរបទសម្ភាសន៍របស់អ្នក ជាពាក្យៗនោះទេ តែត្រូវសរសេរជាគ្រោង និងកំណត់ហេតុខ្លះៗ ដែលបង្ហាញពីមុំព័ត៌មានដែលអ្នកចង់សរសេរ និងព័ត៌មានដែលអ្នកចង់បាន។
ផ្ទៀងផ្ទាត់ឧបករណ៍របស់អ្នក
ថ្ម ក្បាលមេក្រូ (កុំភ្លេចសាកធ្វើតេស្ត) អាវការពារខ្យល់ សម្អាតទិន្នន័យមេម៉ូរីកាត SD ដងឧបករណ៍ចាប់សំទ្បេងពីចម្ងាយ និងកាសស្ដាប់សំទ្បេង…
នៅទីតាំងយកព័ត៌មាន : ជ្រើសរើសដៃគូសន្ទនាល្អៗ
តើអ្នកត្រូវយកព័ត៌មានពីនរណា ? មានដៃគូសន្ទនាពីរប្រភេទ ប្រើសម្រាប់គ្រប់ប្រធានបទ :
- តួអង្គសំខាន់ៈ ជាមនុស្សដែលពាក់ព័ន្ធផ្ទាល់ទៅនឹងព្រឹត្តិការណ៍។ គេនឹងរៀបរាប់ ពិពណ៌នារឿងហេតុ និងផ្តល់សក្ខីកម្ម។
- អ្នកជំនាញ : ចំណេះដឹងរបស់ពួកគេអំពីប្រធានបទធ្វើឲ្យពួកគេទទួលបានការទុកចិត្ត។ ពួកគេអាចពន្យល់ វិភាគ និងធ្វើអត្ថាធិប្បាយ។
នៅទីតាំងយកព័ត៌មាន : រៀបចំបទសម្ភាសន៍ជាមួយដៃគូសន្ទនា
អ្នកត្រូវប្រាកដថាអ្នកនឹងរកបានដៃគូសន្ទនាល្អៗ។ អ្នកត្រូវណាត់ជួប លើកលែងតែមានករណីពិសេស។ អ្នកត្រូវពន្យល់ប្រាប់ពួកគេថាអ្នកគឺជាអ្នកយកព័ត៌មាន អ្នកធ្វើការឲ្យស្ថានីយវិទ្យុមួយឈ្មោះ… លើសពីនេះ អ្នកត្រូវបញ្ជាក់ឲ្យបានច្បាស់ថាអ្នកចង់ធ្វើបទសម្ភាសន៍មួយ ដើម្បីយកទៅប្រើប្រាស់ក្នុងគោលបំណងអ្វីមួយ (ជាអត្ថបទដកស្រង់ បទសម្ភាសន៍កាត់រួច…)
អំឡុងពេលធ្វើបទយកការណ៍
ក្រោយធ្វើបទសម្ភាសន៍មួយរួចរាល់ហើយ អ្នកត្រូវពិនិត្យគុណភាពនៃខ្សែអាត់សំទ្បេង។ សូមស្ដាប់ប៉ុន្មានឃ្លាចុងក្រោយឡើងវិញ។ ប្រសិនជាសំទ្បេងមិនច្បាស់ល្អ (ឧ. មានសំទ្បេងខ្យល់ សំទ្បេងម៉ាស៊ីនខ្លាំងពេក…) អ្នកត្រូវធ្វើសាឡើងវិញ ព្រោះដៃគូសន្ទនារបស់អ្នកនៅក្បែរអ្នកនៅឡើយ។ គាត់នឹងយល់ ប្រសិនជាអ្នកពន្យល់ពីមូលហេតុសមរម្យ។
មិនត្រូវឲ្យដៃគូសន្ទនារបស់អ្នកកាន់ក្បាលមេក្រូ
អ្នកគឺជាអ្នកដឹកនាំបទសម្ភាសន៍។ អ្នកត្រូវតាមដានគុណភាពសំទ្បេងខ្សែអាត់។