និយមន័យនៃព័ត៌មានខ្លី
ព័ត៌មានខ្លីគឺជាព័ត៌មានមួយ ដែលគេមិនសរសេរលម្អិតច្រើនពីប្រធានបទមួយ ដូចជាបទយកការណ៍ ឬក៏ព័ត៌មានជាសំទ្បេង។ គេសរសេរព័ត៌មានប្រភេទនេះនៅក្នុងព័ត៌មានបែបរហ័ស ឬព័ត៌មានប្រចាំថ្ងៃមួយពេញលេញ។
រយៈពេលនៃព័ត៌មានខ្លីមួយ
ដូចដែលឈ្មោះរបស់វា អត្ថបទព័ត៌មានខ្លីមានត្រឹមតែប៉ុន្មានជួរប៉ុណ្ណោះ។ ជាទូទៅ គេសរសេរព័ត៌មានខ្លីតែបីបួនឃ្លាប៉ុណ្ណោះ។ ចំពោះរយៈពេល វាចន្លោះពីដប់ទៅម្ភៃវិនាទី។ ប្រសិនជាព័ត៌មានខ្លីមួយមានរយៈពេលវែងពេក មានន័យថាអ្នកមិនបានសង្ខេបចំណុចសំខាន់ និងធ្វើឲ្យព័ត៌មានរបស់អ្នកនៅមានចំណុចខ្វះខាតនៅឡើយ។
ទម្រង់នៃព័ត៌មានខ្លីមួយ
ព័ត៌មានខ្លីមួយត្រូវបានបែងចែកជាពីរផ្នែក
ផ្នែកទី១: ឃ្លាទាក់ទាញដំបូង ត្រូវមានព័ត៌មានបច្ចុប្បន្នភាព
មានបច្ចេកទេសសាមញ្ញមួយដើម្បីកំណត់ព័ត៌មានបច្ចុប្បន្នភាព គឺត្រូវសួរខ្លួនឯងថា “តើអ្វីជាព័ត៌មានថ្មី ?”។ ចម្លើយទៅនឹងសំណួរនេះត្រូវសរសេរមួយឃ្លា។ ត្រូវសរសេរឃ្លានេះបែបលក្ខណៈទាក់ទាញ ដើម្បីទាញយកចំណាប់អារម្មណ៍របស់អ្នកស្ដាប់។
ផ្នែកទី២ : ព័ត៌មានបន្ថែម
ផ្នែកនេះត្រូវសរសេរយ៉ាងតិចបំផុតមួយឃ្លា។ ប៉ុន្តែ ជាធម្មតា វាមានចំនួន ២ ឬ៣ឃ្លា ដែលពោរពេញទៅដោយធាតុសំខាន់ៗមួយចំនួនដែលធ្វើឲ្យយល់ពីព័ត៌មាន។ មានចំណុចមួយ ដើម្បីជឿជាក់ថាអ្នកមិនបានភ្លេចអ្វីទាំងអស់ : នោះគឺសំណួរទាំងប្រាំ (នរណា ពេលណា កន្លែងណា ជាអ្វី និងហេតុអ្វី)។ អ្នកត្រូវគិតផ្ទៀងផ្ទាត់ថាអត្ថបទខ្លីរបស់អ្នកបានឆ្លើយតបទៅនឹងសំណួរប្រាំនេះ។
លំហាត់ : សូមយកអត្ថបទព័ត៌មានខ្លីមួយ ដែលសរសេរដោយសហការីម្នាក់របស់អ្នក និងសូមសរសេរអត្ថបទនេះឡើងវិញ ដោយគូសចំណាំលើគ្រប់ពាក្យ ដែលអ្នកគិតថាមិនសំខាន់។ បន្ទាប់មក ប្រគល់អត្ថបទនោះឲ្យទៅអ្នកយកព័ត៌មានម្នាក់ផ្សេងទៀត និងសុំឲ្យគេសរសេរឡើងវិញ។ អ្នកយកព័ត៌មានរូបនោះនឹងសង្ខេបអត្ថបទ។ សកម្មភាពនេះកើតមានឡើង នៅពេលរៀបចំការផ្សាយពេលល្ងាច។ អ្នកយកព័ត៌មានប្រចាំថ្ងៃសរសេរព័ត៌មានខ្លីៗ តាមរយៈការឆ្លើយឆ្លងព័ត៌មានតាមទូរស័ព្ទ ឬបទយកការណ៍។ ព្រឹកឡើង ពិធីករអានដំណឹងទាំងនោះបែបផ្សេង និងសរសេរវាឡើងវិញ ឲ្យកាន់តែខ្លី ជាមួយនឹងទម្រង់ដ៏ល្អឥតខ្ចោះ។ ការងារវិទ្យុគឺជាការងារជាក្រុម។