តួនាទីរបស់អ្នកសារព័ត៌មានគឺដឹកនាំកិច្ចសម្ភាសន៍ និងគោរពតាមលក្ខខណ្ឌកំហិតនៃការរៀបចំ។ ដូច្នេះ គាត់ត្រូវ៖
- ជូនដំណឹងពីវិធានទូទៅដល់អ្នកទទួលបទសម្ភាសន៍ដូចជា៖
- រយៈពេលនៃកិច្ចសម្ភាសន៍៖ ពេលវេលាកំណត់ដែលយើងមាន (សម្រាប់ការថត និងការចាក់ផ្សាយ)។
- ប្រភេទនៃបទសម្ភាសន៍៖ កិច្ចសម្ភាសន៍ផ្សាយបន្តផ្ទាល់ ឬមិនផ្ទាល់។
- ក្របខ័ណ្ឌផ្សាយព័ត៌មាន (សារព័ត៌មានទូរទស្សន៍ ទស្សនាវដ្តី។ល។)
- ទាញយកព័ត៌មានដ៏គួរឲ្យចាប់អារម្មណ៍បំផុតពីអ្នកទទួលបទសម្ភាសន៍
- បើសិនជាដៃគូសន្ទនាគឺជាអ្នកស៊ាំក្នុងការសម្ភាសន៍ គាត់នឹងត្រៀមសុន្ទរកថារបស់គាត់រួចជាស្រេច។ ដូច្នេះ អ្នកសារព័ត៌មានត្រូវបង្កើតឧបសគ្គដល់គាត់ ជាមួយនឹងព័ត៌មានច្បាស់លាស់ និងពិតប្រាកដ ដែលបានត្រៀមនៅមុនកិច្ចសម្ភាសន៍។
- បើសិនជាអ្នកត្រូវបានសម្ភាស ភិតភ័យដោយសារការសម្ភាសន៍ ឬរន្ធត់ចិត្តចំពោះហេតុការណ៍ចៃដន្យណាមួយ អ្នកសារព័ត៌មានត្រូវចាប់ផ្តើមបទសម្ភាសន៍ ដោយការសួរសំណួរសាមញ្ញ សំណួរបិទ ឬសំណួរស្និទ្ធស្នាល (ដូចជា អាយុ ទីលំនៅ ឈ្មោះជាដើម) ហើយគួរតែប្រើពាក្យដូចគ្នានឹងដៃគូសន្ទនាតែម្តង ប្រសិនបើអាច។ ម្យ៉ាងទៀត អ្នកសារព័ត៌មានត្រូវជួយអ្នកទទួលការសម្ភាសន៍ តែមិនត្រូវឆ្លើយជំនួសគាត់ទេ។
បច្ចេកទេសសម្ភាស
- មិនត្រូវបញ្ចូលចម្លើយក្នុងសំណួរទេ
ពេលដែលចោទជាសំណួរអំពីប្រធានបទអ្វីមួយ អ្នកទទួលបទសម្ភាសន៍នឹងបំពេញចម្លើយតាមរយៈការផ្តល់ព័ត៌មាន។ ដូច្នេះ ប្រសិនបើអ្នកកាសែតឆ្លើយនឹងសំណួរខ្លួនឯងទៅហើយនោះ តើមានអ្វីទៀតសម្រាប់គាត់ត្រូវនិយាយ ?
- បកស្រាយចម្លើយឡើងវិញសម្រាប់ទូរទស្សនិកជន
ការបកស្រាយចម្លើយសាជាថ្មីគឺជាមូលដ្ឋាននៃសំណួរបន្ទាប់។
- ជាទូទៅ ការបកស្រាយឡើងវិញស្ថិតនៅឆ្លាស់គ្នាជាមួយសំណួរ និងចម្លើយ។
- និយាយជាគោល តាមរយៈការបកស្រាយឡើងវិញនូវចម្លើយដ៏វែងឆ្ងាយ ឬបង្កប់លក្ខណៈបច្ចេកទេសច្រើន អ្នកកាសែតផ្តល់នូវព័ត៌មានច្បាស់លាស់ដល់អ្នកមើល ដើម្បីឲ្យពួកគាត់តាមទាន់បទសម្ភាសន៍គ្រប់ជ្រុងជ្រោយ។
- កំណត់ដែនសំណួរ
ការកំណត់ដែនសំដៅលើប្រយោគពន្យល់ដែលត្រូវបាននិយាយ មុនចោទជាសំណួរ។ ប្រយោគនេះផ្តល់នូវព័ត៌មានដែលធ្វើឲ្យសំណួរកាន់តែច្បាស់លាស់ ដើម្បីទទួលបាននូវចម្លើយដែលសម្បូរដោយព័ត៌មានថ្មីប្លែក។
ឧទាហរណ៍៖ បទសម្ភាសន៍របស់លោក ប៊ីល ក្លីនតុន ជាមួយសារព័ត៌មាន ឡឺ ម៉ុង
« លោកទើបតែមានអាយុ ៥៤ ឆ្នាំ តែលោកបានឈានដល់ចំណុចកំពូលទៅហើយ តាមរយៈបទពិសោធន៍ និងទំនាក់ទំនងដែលមិនគួរឲ្យជឿថា មនុស្សម្នាក់អាចធ្វើបាន ហើយលោកត្រូវចាកចេញពីតំណែង។ តើលោកនឹងធ្វើអ្វីជាមួយនឹងពេលវេលារបស់លោក ? »
- ប្រើប្រាស់ពាក្យគន្លឹះនៅចុងសំណួរ
ដៃគូសន្ទនារង់ចាំឆ្លើយតប ពេលដែលគាត់បានស្តាប់ឮពាក្យគន្លឹះមួយដែលក្តោបអត្ថន័យនៃសំណួរទាំងមូល។ ការបន្ថែមប្រយោគបន្ទាប់ពីពាក្យគន្លឹះ មិនត្រឹមតែធ្វើឲ្យខូចសំណួរប៉ុណ្ណោះទេ ថែមទាំងបង្អាក់ដល់ការឆ្លើយសំណួរទៀត។
- « តើលោកមានតួនាទីអ្វី/…(ក្នុងប្រត្តិបត្តិការណ៍នេះ?)» L
- « ក្នុងប្រត្តិបត្តិការនេះ តើលោកមានតួនាទីអ្វី? » J
បង្កើតសំណួរតាមរយៈពាក្យគន្លឹះ
អ្នកសារព័ត៌មានកត់ត្រាសំណួររបស់ខ្លួន ដោយសរសេរបង្រួញជាពាក្យគន្លឹះនៅលើសន្លឹកក្រដាសតូចមួយ ឬបាតដៃរបស់ខ្លួន ដើម្បីងាយស្រួលក្រឡេកមើល។ គាត់ធ្វើរបៀបនេះ ដើម្បីជៀសវាងសំឡេងក្រដាសរំខានដល់ឧបករណ៍ស្រូបសំឡេង អាចសម្លឹងមើលអ្នកទទួលការសម្ភាសន៍ផង និងផ្តោតអារម្មណ៍លើចម្លើយផង។